🟣 लक्ष्मी मार्केट परिसरात एकेरी वाहतूक प्रायोगिक तत्त्वावर... 🟣 पोलीस प्रशासनाकडून जाहिरनामा प्रसिध्द 🟣 मिरज सुधार समितीच्या मागणीला यश

🟣 लक्ष्मी मार्केट परिसरात एकेरी वाहतूक प्रायोगिक तत्त्वावर...

🟣 पोलीस प्रशासनाकडून जाहिरनामा प्रसिध्द 

🟣 मिरज सुधार समितीच्या मागणीला यश

---------------------------------------------------------------

मिरज शहरातील लक्ष्मी मार्केटमध्ये वाहतूक कोंडीची समस्या जटील बनली आहे. वाहतुकीला शिस्त लावण्यासाठी महाराणा प्रताप चौक ते दत्त चौक आणि तिरंगा चौक (जुने अग्निशमन स्टेशन) ते दत्त्त चौक (लोणी बाजार) हा मार्ग आणि महाराणा प्रताप चौक ते किल्ला भाग, न्यायाधीश निवासस्थान चौक आणि जवाहर चौक ते किसन चौक असे दुचाकी वगळता एकेरी वाहतुक सुरू करण्याची मागणी मिरज सुधार समितीने मिरज शहर वाहतूक नियंत्रण शाखेकडे २७ जून २०२४ रोजी केली होती. या विषयावर मिरज सुधार समितीने सातत्याने पाठपुरावा केल्यानंतर सांगली जिल्हा पोलीस अधीक्षक यांनी एकेरी वाहतूक बाबत प्रायोगिक तत्त्वावर जाहीरनामा प्रसिद्ध केला आहे. याबाबत काही सूचना किंवा हरकत असेल तर.. ११ ऑगस्टपर्यंत मिरज सुधार समितीच्या ८६२४००७७१३ या हेल्पलाईनवर कळवा. येणाऱ्या सूचना किंवा हरकत संकलित करून प्रशासनाकडे पाठपुरावा केला जाणार असल्याचे मिरज सुधार समितीचे अध्यक्ष राकेश तामगावे आणि कार्यवाह असिफ निपाणीकर यांनी सांगितले.

मिरज शहरातील वाहतूक कोंडीबाबत मिरज सुधार समितीच्या वतीने २७ जून २०२४ रोजी मिरज शहर वाहतूक नियंत्रण शाखा सहाय्यक पोलीस निरीक्षक सुनील गिड्डे यांना निवेदन दिले होते. निवेदनात म्हटले आहे, समितीच्या महाराणा प्रताप चौकातून महापालिका, प्रांत, तहसील, बांधकाम, मिरज न्यायालय आदी शासकीय कार्यालयेसह शाळा व महाविद्यालये आहेत. शिवाय, मिरज पूर्व भागातून याच चौकातून शहरात यावे लागते.

काही वर्षापूर्वी महाराणा प्रताप चौक ते दत्त चौक आणि तिरंगा चौक (जुने अग्निशमन स्टेशन) ते दत्त्त चौक (लोणी बाजार) या मार्गावर दुचाकी वगळता एकेरी वाहतुक होती. मात्र, लोणी बाजारात भाजी बाजार भरला जात असल्याने हा प्रयोग यशस्वी झाला नाही. सध्या येथील भाजी बाजार हटविण्यात आला आहे.  

महाराणा प्रताप चौक ते दत्त चौक आणि तिरंगा चौक ते दत्त्त चौक (लोणी बाजार)  या दोन्ही मार्गावर रिक्षासह अन्य चार चाकी वाहने एकमेकांच्या अडवे येत असल्याने अपघात व वादावादीचे प्रकारही घडत आहेत.  म्हणून वाहतुकीला शिस्त लावण्यासाठी एकेरी वाहतूक सुरू करणे गरजेचे असल्याचे नमूद केले आहे.