🟣 सर्व्हर डाऊनच्या नावाखाली होणारी लूट थांबवा 🟣 मिरजेत एकात्मिक सुविधा केंद्रात होत आहे पालकांची लूट 🟣 मिरज सुधार समितीचे प्रांताधिकाऱ्यांना दिले निवेदन

 

🟣  सर्व्हर डाऊनच्या नावाखाली होणारी लूट थांबवा

 🟣 मिरजेत एकात्मिक सुविधा  केंद्रात होत आहे पालकांची लूट 

🟣 मिरज सुधार समितीचे प्रांताधिकाऱ्यांना दिले निवेदन 

मिरज तहसीलदार कार्यालय परिसरातील एकात्मिक नागरी सुविधा आणि सेवा केंद्रात सर्व्हर डाऊनच्या नावाखाली शैक्षणिक तसेच, विविध योजनांचे दाखले वितरित करताना सेवा केंद्र चालकांकडून अनधिकृत एजंट नेमून सर्वसामान्यांची होणारी आर्थिक पिळवणूक थांबविण्याची आग्रही मागणी मिरज सुधार समितीने प्रांताधिकारी उत्तम दिघे यांच्याकडे निवेदनाद्वारे केली आहे.

मंगळवारी मिरज सुधार समितीचे ऍड. ए. ए. काझी, अध्यक्ष राकेश तामगावे, उपाध्यक्ष संतोष जेडगे कार्यवाह असिफ निपाणीकर, जहिर मुजावर, नरेश सातपुते, तौफिक देवगिरी, शब्बीर बेंगलोरे, अझीम बागवान, अभिजीत दाणेकर, वसीम सय्यद, सलीम खतीब आदी सदस्यांनी प्रांताधिकारी उत्तम दिघे यांची भेट घेतली. त्यांना दिलेल्या निवेदनात म्हटले आहे की,  जून-जुलै महिन्यांत अनेक शैक्षणिक संस्थांचे प्रवेश प्रक्रिया सुरू होते. काही संस्थांचे तसेच परिक्षांचे प्रवेश प्रक्रिया सुध्दा सुरू झाली आहे. अनेक पालकांना आपल्या पाल्यांच्या प्रवेश प्रक्रिया व अन्य शैक्षणिक दाखल्यांसाठी विविध शासकीय योजनांसाठी आवश्यक दाखले काढण्यासाठी तासनतास रांगेत थांबावे लागत आहे.

मात्र, मिरज तहसीलदार कार्यालय आवारातील अनधिकृत एजंट सेवा केंद्र तसेच, एकात्मिक नागरी सुविधा केंद्रातील काही कर्मचाऱ्यांना हाताशी धरून दाखले काढून देण्याच्या नावाखाली  तसेच, सर्व्हर डाऊनच्या नावाखाली दाखले काढून देण्यासाठी सर्वसामान्यांची पिळवणूक होत आहे. डोमिसिएल दाखला, नॉन क्रीमिनियर आदी दाखले व प्रतिज्ञापत्र करण्यासाठी १००० ते १५०० रूपयांपर्यंत रक्कमेची मागणी करीत आहेत. या गैरप्रकारात मिरज तहसीलदार कार्यालयातील काही कर्मचाऱ्यांचा सुध्दा सहभाग असल्याचा आरोप मिरज सुधार समितीने केला आहे.

 एकात्मिक नागरी सेवा केंद्र आणि अन्य सेवा केंद्र चालकांकडून अनधिकृत एजंट नेमून सर्वसामान्यांची होणारी आर्थिक पिळवणूक थांबविण्याची तसेच, एकात्मिक नागरी सुविधा केंद्रासह विविध ठिकाणच्या सेवा केद्रात विविध दाखले तसेच, प्रतिज्ञापत्राचे शासन दर फलक ठळक अक्षरात दर्शनी भागात लावण्याची मागणी केली आहे. याबाबत लवकरच सेवा केंद्र चालक आणि महसूल विभागाची संयुक्त बैठक घेऊन कडक सूचना करण्याचे आश्वासन प्रांताधिकारी उत्तम दिघे यांनी मिरज सुधार समितीच्या शिष्टमंडळाला दिले आहे.