🔴कोल्हापूर - मिरज - कलबुर्गी एक्स्प्रेसचे मिरजेत उत्साहात स्वागत

 

🔴कोल्हापूर - मिरज - कलबुर्गी एक्स्प्रेसचे मिरजेत उत्साहात स्वागत
🔴 ३० नोव्हेंबर पर्यंंत शुक्रवार वगळता दररोज धावणार गाडी
कायमस्वरूपी गाडी सुरू करण्याची रेल्वे प्रवासी संघाची मागणी

--------------------------------

कोल्हापूर-मिरज-कलबुर्गी विशेष एक्स्प्रेस बुधवारपासून सुरू करण्यात आली. बुधवारी मिरज रेल्वे स्थानकावर रेल्वे प्रवासी संघ, मिरज सुधार समितीसह विविध प्रवासी संघटनांच्या कार्यकर्त्यांनी उत्साहात या गाडीचे स्वागत केली. ही गाडी ३० नोव्हेंबरपर्यंत प्रायोगिक तत्वावर धावणार आहे. दरम्यान, ही गाडी कायमस्वरूपी सुरू करण्याची मागणी रेल्वे प्रवासी संघाने केली आहे.

      सांगली, कोल्हापूर आणि सोलापूर जिल्ह्यातील प्रवाशांची मागणी तसेच, रेल्वे प्रवासी संघ, मिरज सुधार समिती, रेल्वे कृती समिती व रेल्वे प्रवासी संस्थासह अन्य प्रवासी संघटनांनी पाठपुरावाचा रेटा लावल्याने रेल्वे प्रशासनाने कोल्हापूर-मिरज-कलबुर्गी विशेष एक्स्प्रेस सुरू करण्याचा निर्णय घेतला होता. अखेर बुधवार २४ सप्टेंबरपासून कोल्हापूर-कलबुर्गी एक्स्प्रेस धावू लागली आहे.

        बुधवारी सकाळी मिरज रेल्वे स्थानकावर स्टेशन अधीक्षक जे. आर. तांदळे, रेल्वे प्रवासी संघाचे अ‍ॅड. ए. ए. काझी, अध्यक्ष नरेश सातपुते, उपाध्यक्ष वसीम सय्यद, मिरज सुधार समितीचे अध्यक्ष राकेश तामगावे, तौफिक देवगिरी, शब्बीर बेंगलोेरे, मिरज रेल्वे कृती समितीचे सुकुमार पाटील, रेल्वे प्रवासी संस्थेचे किशोर भोरावत, संदीप शिंदे, बाबासाहेब सातपुते, वाय. सी. कुलकर्णी, गिरीश जाधव, राजेंद्र पाटील यांच्यासह  विविध प्रवासी संघटनांच्या कार्यकर्त्यांनी उत्साहात या गाडीचे स्वागत केले. चालक व गार्डचा सत्कार करण्यात आला.

      

      ही विशेष एक्स्प्रेस गाडी ३० नोव्हेंबरपर्यंत शुक्रवार वगळता दररोज धावणार आहे. कोल्हापूरहून सकाळी ६.१० वाजता सुटेल, मिरजेहून सकाळी ७.५०वाजता सुटून दुपारी २.३० वाजता सोलापूर आणि कलबुर्गीला दुपारी ४.१० वाजता पोहचेल. दरम्यान, ही गाडी कायमस्वरूपी सुरू करण्याची मागणी रेल्वे प्रवासी संघ आणि मिरज सुधार समितीने केली आहे.