🔴 बेकायदेशीर डिजीटल फलकांमुळे शहरात कायदा व सुव्यवस्थेचा प्रश्न ऐरणीवर 🔴 मिरज सुधार समितीच्या कार्यकर्त्यांनी महापालिका अधिकाऱ्यांना धरले धारेवर

 

🔴 बेकायदेशीर डिजीटल फलकांमुळे शहरात कायदा व सुव्यवस्थेचा प्रश्न ऐरणीवर

🔴 मिरज सुधार समितीच्या कार्यकर्त्यांनी महापालिका अधिकाऱ्यांना धरले धारेवर

🟣 नवरात्रोत्सवात अनेक ठिकाणी बेकायदेशीर स्वागत कमानी बसविल्याचे स्पष्ट

_________________________________

महापालिकेतील निष्क्रिय अधिकाऱ्यांच्या नाकर्तेपणामुळे शहरात वाहतुक कोंंडी निर्माण करून बेकायदेशीर डिजीटल स्वागत कमानी उभे केले जात आहेत. डिजीटल फलकांवरील देवी-देवतांचे चित्र असल्याने त्यांची विटंबना होऊन  शहरात कायदा व सुव्यवस्थेचा प्रश्न निर्माण होण्याची दाट शक्यता आहे. बुधवारी याबाबत मिरज सुधार समिेतीच्या कार्यकर्त्यांनी महापलिका अधिकाऱ्यांना धारेवर धरले असता, नवरात्रोत्सवमध्ये महाराणा प्र्रताप चौक, किसान चौक, तिरंगा चौक, शास्त्री चौक आदी ठिकाणी उभे करण्यात आलेले डिजीटल स्वागत कमानी विनापरवाना व बेकायदेशीर असल्याचे स्पष्ट झाले आहे.

मंगळवारी मध्यरात्री दोन तरूणांच्या वादातून फाडण्यात आलेल्या बेकायदेशीर डिजीटल फलकामुळे शहरात कायदा व सुव्यवस्थेचा प्रश्न निर्माण झाला होता. मात्र, पोलीस प्रशासनाच्या सतर्कतेमुळे हा अनर्थ टळला. मात्र, बुधवारी मिरज शहरात तणावपुर्ण शांतता होती. या घटनेनंतर पुन्हा शहरात गर्दीच्या ठिकाणी लागणाऱ्या बेकायदेशीर डिजीटल फलक व कमानीचा विषय ऐरणीवर आला आहे.

शहरात बेकायदेशीर डिजीटल फलकांमुळे शहराला बकाल स्वरूप आले आहे.  बेकायदेशीर डिजीटल फलकांमुळे शहरात कायदा व सुव्यवस्थेचा प्रश्न निर्माण होत आहे. स्वागत कमानीवरुन २००९ ला मिरज शहरात दंगल उसळली होती. याचा विसर महापालिका प्रशासनास पडल्याचे दिसते. तसेच, शहरात बेकायदेशीर विनापरवाना डिजीटल फलकांवर कारवाई करण्याबाबत महापालिका अतिक्रमण हटाव पथक कुचकामी ठरत आहे. अतिव्रâमणासह बेकायदेशीर डिजीटल फलकांबाबत तक्रारी बरोबरच वरिष्ठांचा आदेश झाल्यानंतरही अतिक्रमण हटाव पथकाकडून केवळ नोटीसीचा फार्स केला जातो. त्यामुळे संपुर्ण शहराचे विद्रुपीकरण झाले आहे.  

म्हणून मिरज सुधार समितीने शहरात लागणाऱ्या तसेच, कायदा व सुव्यवस्था निर्माण करणाऱ्या बेकायदेशीर डिजीटल फलकाविरोधात मोहिम सुरु केली आहे. बुधवारी मिरज सुधार समितीचे अ‍ॅड. ए. ए. काझी, अध्यक्ष राकेश तामगावे, उपाध्यक्ष संतोष जेडगे, कार्यवाह असिफ निपाणीकर, रामलिंग गुगरी, तौफिक देवगिरी, अभिजीत दाणेकर, नरेश सातपुते, वसीम सय्यद, युसूफ निशाणदार, अमीर डांगे, शब्बीर बेंगलोरे, सदीप हंकारे, सलीम खतीब आदी सदस्यांनी महापालिका सहाय्यक आयुक्त अनिस मुल्ला आणि कार्यालयीन अधिक्षक शिवाजी शिंदे यांच्याकडे नवरात्रोत्सवमध्ये बसविण्यात आलेल्या डिजीटल स्वागत कमानीबाबत माहिती मागविली असता, महाराणा प्रताप चौक, किसान चौक, तिरंगा चौक, शास्त्री चौक आदी ठिकाणी उभे करण्यात आलेले डिजीटल स्वागत कमानी विनापरवाना व बेकायदेशीर असल्याचे स्पष्ट झाल्याने मिरज सुधार समितीच्या कार्यकर्त्यांनी महापालिका अधिकाऱ्यांना धारेवर धरले.